नावापासूनच उत्सुकता निर्माण केलेल्या ‘पाच फुटाचा बच्चन’ या चित्रपटातील बच्चन कोण? या रहस्याचा आता उलगडा झाला आहे. युवा अभिनेत्री श्रुती मधुदीप या चित्रपटातून “पाच फुटाचा बच्चन” या भूमिकेतून पदार्पण करत आहे. विशेष म्हणजे, मूळ नाटकातही श्रुतीनेच ही भूमिका साकारली होती. “पाच फुटाचा बच्चन” हा चित्रपट येत्या ९ ऑक्टोबरला प्रदर्शित होणार आहे.
कौस्तुभ रमेश देशपांडे यांनी चित्रपटाचं लेखन आणि दिग्दर्शन केलं आहे. या चित्रपटात गौरी नलावडे, शशांक शेंडे, चिन्मयी सुमित, क्षितिश दाते, किशोर कदम, आशय कुलकर्णी, पुष्कराज चिरपुटकर, ओमप्रकाश शिंदे, समीर पाटील, विनोद वणवे यांच्या महत्वाच्या भूमिका आहेत.
नाटक, शॉर्टफिल्म्समध्ये काम केल्यानंतर श्रुती मधुदीप ‘पाच फुटाचा बच्चन’ या चित्रपटातून चित्रपटसृष्टीत पदार्पण करतेय. पदार्पणातच प्रमुख भूमिका साकारलेली श्रुती मधुदीप म्हणाली, “लहानपणापासूनच माझा कल कला क्षेत्राकडे होता. त्यामुळे गाणे, नाच, अभिनयाच्या संधी मला खुणावायच्या. आठ वर्ष कथ्थक शिकल्यानंतर नाटकात काम करू लागले. अभिनय करताना आपल्याला सगळ्यात आनंदी वाटतं आणि तल्लीन होता येतं, हे समजल्यावर मी अनेक नाट्यप्रयोग, शॉर्टफिल्म्समध्ये स्वत:ला, कथेला आजमावून बघितलं. त्यातच मला सुमित्रा भावे या ज्येष्ठ दिग्दर्शिकेसोबत काम करण्याची संधी मिळाली. त्यांच्याकडे मी सहाय्यक म्हणून काम करताना मला चित्रपट हे माध्यम अधिक समजत गेलं. कथा, आशयाकडे पाहण्याची स्पष्टता, कलाकार म्हणून कसं जगायचं याचा वस्तूपाठ मिळाला. त्यातूनच त्यांच्या ‘साखरेपेक्षा गोड’ नावाच्या शॉर्टफिल्ममध्ये मला मुख्य भूमिका मिळाली. या दरम्यानच ‘पाच फुटाचा बच्चन‘ नाटक सुरू झालं. माझ्यासारख्या शहरी मुलीला या कथेमुळे कोल्हापूरच्या रांगड्या मुलीचं पात्र मिळाले आणि खजिना सापडल्यासारखे वाटलं. नाटकाला खूप चांगला प्रतिसाद मिळाला. हे नाटक करणं, त्या नाटकाचा सिनेमा होणं, आणि त्यात माझी मध्यवर्ती भूमिका असणं, हे स्वप्नवत आहे. मुख्य भूमिका साकारत असलेला माझा हा पहिलाच सिनेमा येतो आहे. त्यामागचा सगळा प्रवास माझ्यासाठी खूप समृद्ध करणारा आहे.
लेखक – श्री. नितिन फणसे सर
डिजिटल क्रिएटर – नाट्य, मालिका आणि चित्रपट समीक्षक
