आजकाल कोणत्या सीझनला काय काय बदल होतील सांगता येत नाही. हिवाळ्यात पाऊस, पावसाळ्यात गरमी हे सारं सुरूच आहे. इतकंच काय आता तर मार्च-मे दरम्यान येणारी कैरीही डिसेंबरमध्ये पाहायला मिळणार आहे. ऐकून गोंधळात ना? हो… ‘कैरी’ हा मराठमोळा सिनेमा लवकरच संबंध महाराष्ट्रात प्रदर्शित होतोय. नुकतंच या सिनेमाचं पोस्टर समोर आलं असून चित्रपटाची प्रदर्शनाची तारीख जाहीर करण्यात आली आहे. चित्रपटाच्या चित्रीकरणापासूनच या चित्रपटाची उत्सुकता होती. राष्ट्रीय पुरस्कार विजेते दिग्दर्शक शंतनू गणेश रोडे यांचा रोमँटिक थ्रिलर ‘कैरी’ हा सिनेमा येत्या १२ डिसेंबरला प्रदर्शित होणार आहे.
‘कैरी’ या चित्रपटात सायली संजीव, सुबोध भावे, सिद्धार्थ जाधव, शशांक केतकर, अरुण नलावडे, सुलभा आर्या हे कलाकार मुख्य भूमिकेत आहेत. इतकंच नाहीतर या चित्रपटात सायली संजीव आणि सिद्धार्थ जाधव पहिल्यांदाच एकत्र येणार आहेत.
‘कैरी’ या चित्रपटाची निर्मिती ‘९१ फिल्म स्टुडिओज’ अंतर्गत झाली आहे. या स्टुडिओने बऱ्याच भाषांमध्ये चित्रपटांची निर्मिती केली आहे. त्यात ‘लोच्या झाला रे’ आणि ‘शेर शिवराज’ या दोन ब्लॉकबस्टर व्यावसायिक अशा मराठी चित्रपटांचा समावेश आहे. तर ‘कैरी’ हा त्यांचा तिसरा सिनेमा आहे. शिवाय ‘कैरी’ हा सिनेमा ‘अमेय विनोद खोपकर एंटरटेंमेंट’ यांची सहनिर्मिती आहे, तर ‘कैरी’ चित्रपटाची निर्मिती नवीन चंद्रा, नंदिता राव कर्नाड, स्वाती खोपकर, निनाद नंदकुमार बत्तीन यांनी केली आहे. तसेच तबरेझ पटेल हे या चित्रपटाचे सहनिर्माते आहेत.
‘कैरी’चे लेखन स्वरा मोकाशी यांनी केले आहे. तर चित्रपटाचे छायांकन प्रदीप खानविलकर यांचे आहे. आणि चित्रपटाच्या संकलनाची जबाबदारी मनीष शिर्के यांनी सांभाळली आहे. तसेच, चित्रपटाला संगीत दिलंय निषाद गोलांबरे आणि पंकज पडघन यांनी, तर पार्श्वसंगीत दिलंय साई पियूष यांनी.
दिग्दर्शक शंतनू रोडे यांच्या ‘कैरी’ या सिनेमात आपल्याला रोमँटिक थ्रिलर असे कोणते ट्विस्ट अँड टर्न पाहायला मिळणार आहेत याची उत्सुकता या पोस्टरने वाढविली आहे.
लेखक – श्री. नितिन फणसे सर
डिजिटल क्रिएटर – नाट्य, मालिका आणि चित्रपट समीक्षक
