वाघ्या-मुरळीच्या पारंपरिक लोकसंस्कृतीचा वेध घेत एका स्त्रीची कहाणी “फुला” या चित्रपटातून पाहायला मिळणार आहे. अस्सल संगीताची मेजवानी मिळणार असून, बऱ्याच काळानंतर मराठी चित्रपटात सात गाण्यांचा भरभक्कम अल्बम ऐकायला मिळणार आहे. सांगली जिल्ह्यातील आटपाडी गावातील काही नवोदित तरुणांनी एकत्र येऊन हा चित्रपट तयार केला आहे.
ज्येष्ठ पत्रकार, एबीपी माझा आणि एबीपी न्यूजचे सीनियर एक्झिक्युटिव्ह व्हाइस प्रेसिडेंट राजीव खांडेकर यांच्या प्रमुख उपस्थितीत “फुला” या चित्रपटाचे पोस्टर आणि संगीत प्रकाशन सोहळा दिमाखात संपन्न झाला. याप्रसंगी चित्रपटाची संपूर्ण टीम तसेच सॅक्सोफोन वादक राज सोडा हेही उपस्थित होते.
चित्रपटाची कथा अभिषेक जावीर यांची असून दिग्दर्शनही त्यांचेच आहे तर चित्रपटाची पटकथा रवीकिरण जावीर यांनी लिहिली आहे. समाधान ऐवळे यांनी संगीत दिग्दर्शन, अमर देवकर यांनी सर्जनशीर दिग्दर्शन, रवीकिरण जावीर, समाधान ऐवळे यांनी गीतलेखन, प्रताप जोशी यांनी छायांकन, अतुल लोखंडे यांनी कला दिग्दर्शन, राहुल प्रजापती यांनी संकलनाची जबाबदारी निभावली आहे. वैशाली सामंत, वैशाली माडे, रोहित राऊत, रवींद्र खोमणे, वैशाली कुलकर्णी, वैष्णवी आदोडे, आकाश नवगिरे यांनी चित्रपटातील गाण्यांना आवाज दिला आहे. तर नृत्य दिग्दर्शन आशुतोष कीर्तिकर आणि सृष्टी जाधव यांचे आहे. वेशभूषाकार कोमल जावीर, अक्षता पाटील असून रंगभूषाकार समाधान भोरे यांनी काम पाहिले आहे.
याप्रसंगी राजीव खांडेकर म्हणाले, आपल्या सर्वांना आपल्या लोककला, लोकपरंपरा याचा अभिमान असतो. ज्या कलाकारांना डोक्यावर घेऊन आपण ज्या कलाकारांचं कौतुक करतो अशा कलाकारांचं प्रत्यक्षातील आयुष्य कस असतं यावर प्रत्यक्षपणे प्रकाश टाकण्याचं प्रयत्न या चित्रपटाच्या माध्यमातून करण्यात आला आहे. नव्या दमाच्या तरुणांनी एकत्र येऊन हा चित्रपट केला आहे. वाघ्या मुरळींच्या आयुष्यावर आधारित असलेल्या वेगळ्या धाटणीच्या या चित्रपटाला आपण प्रेक्षक म्हणून नक्कीच साथ दिली पाहिजे.
“फुला” ही एका मुरळीच्या पोटी जन्मलेल्या निरागस मुलीची संघर्षमय कथा आहे. तमाशा फड, जागरण गोंधळ या पारंपरिक सांस्कृतिक पटावर आधारित ही गोष्ट महाराष्ट्राच्या लोकपरंपरेतून आकार घेते. कान्हा तुझी बासरी, माझा राजा मल्हारी, आसरा तू माझ्या जीवाचा, कुंकू कोरलं कपाळी, मुरळी झाले मी गं बाई, कपाळी सजलं बाशिंग, डर्बीचा थरार ही सात गाणी या चित्रपटात आहेत. प्रसंगानुरूप येणाऱ्या या गाण्यातून वाघ्या-मुरळीच्या लोकसंस्कृतीचं चित्रण करत मुरळीच्या भावभावनाही मांडण्यात आल्या आहेत. त्यामुळे अस्सल लोकसंस्कृती आणि आशयघन गाणी असलेला “फुला” हा चित्रपट मोठ्या पडद्यावर पाहणं हा एक अनुभव ठरणार आहे. १७ एप्रिलला “फुला” हा चित्रपट प्रदर्शित होणार आहे.
लेखक – श्री. नितिन फणसे सर
डिजिटल क्रिएटर – नाट्य, मालिका आणि चित्रपट समीक्षक
